အောင်ဘာလေနှင့် ကျမ

မနေ့နေ့လည်က ရုံးက အော်ပရေတာကောင်မလေးက ကျမကို ဖုန်းလွှဲပေးလာပါတယ်။ ဘယ်သူလဲ လို့မေးတော့ မြို့ထဲက ကျမ မသိတဲ့ နံမယ်တစ်ခု...။ ဒါနဲ့ ကျမလည်း ဟိုတလောက နာဂစ်ကာတွန်းပြပွဲက ၀ယ်ထားခဲ့ပြီး သွားမယူရသေးတဲ့ ကာတွန်းကားနဲ့များ သက်ဆိုင်နေမလားဆိုပြီး ကိုင်လိုက်ပါတယ်။

“ဒေါ် xxx.. ပါလားခင်ဗျာ...”
“ဟုတ်ကဲ့ ... ပြောနေပါတယ်ရှင်..အမိန့်ရှိပါ..”
“ကျနော်...(. နံမယ်ကြီးထီဆိုင်တစ်ခု) ကပါ။ အဲဒါ ဒေါ် xxx .... ကံစမ်းမဲ ပေါက်လို့ အကြောင်းကြားတာပါ...”

သဘောပေါက်လိုက်ပါတယ်...။ ဒါမျိုး နှစ်ခါ သုံးခါလောက်ထိထားပြီးပြီဆိုတော့... အရင်အခါတွေတုန်းကလို ကျမ အားနာပါးနာ နားမထောင်ပေးတော့ပါဘူး။ ကျမ ရယ်ချင်သံနဲ့ ပြန်ပြောလိုက်မိပါတယ်။

“မှားနေပြီ ထင်တယ်ရှင့်။ ကျမ ထီမထိုးထားပါဘူး။” .... ဆိုတော့ သူခဏငြိမ်ပြီး
“အဲဒီလိုဆို ကျနော် ပြန်စစ်ကြည့်လိုက်ပါဦးမယ်” ဆိုပြီး ဖုန်းချသွားပါတယ်။

အမျိုးသားကတော့ အဲသလို ကျမ တုံးတိတိ စကားဖြတ်လိုက်တာကို သိပ်သဘောမတွေ့ဘူးနဲ့တူတယ်။ ဘယ်လောက်ဖိုး ကံစမ်းမဲ ပေါက်သလဲဆိုတာတော့ မေးလိုက်ဖို့ ကောင်းတာပေါ့လို့ ပြောနေပါသေးတယ်။ ဘယ်လိုလုပ်မလဲ... ကျမ အဲဒီလောက်တော့ လောဘမကြီးတတ်သေးပါဘူး။ မထိုးတဲ့ထီကို ပေါက်ဖို့ မျှော်လင့်ရတဲ့ အထိလေ...။

တကယ်တော့....ကျမ ထီတစ်ခါ ထိုးခဲ့ဖူးပါတယ်။ မေလတုန်းကပေါ့။ ထီထိုးတာတွေကို ကန့်ကွက်တတ်တဲ့ ကျမ ... အနားထီလာရောင်းတဲ့ သူဆီမှာ ထီထိုးလိုက်တော့ ကျမ သားကြီးက တအံ့တသြကြည့်လို့...။

“ မေမေ ဘာဖြစ်လို့ ထူးထူးဆန်းဆန်း ထီထိုးရတာလဲ”

“ အေးဟယ်... ထီလေးများပေါက်ရင် နာဂစ်ဒဏ်ခံလိုက်ရတဲ့ ဒုက္ခသည်တွေကို ပိုလှူလို့ ရတာပေါ့”...

သူလည်း မျက်လုံးပုတ်ခတ် ပုတ်ခတ်နဲ့ စဉ်းစားနေလေရဲ.။

“မေမေက အကုန်လုံးလှူမှာလား”..

“အင်း.... မေမေတို့ တတ်နိုင်သလောက်တော့ လှူခဲ့တာပဲ၊ ဒီထက်လည်း မတတ်နိုင်တော့ဘူးလေ။ ဒါပေမယ့် သားရယ်... သူတို့တွေက အများကြီးရယ်... ထီပေါက်ဖို့ကို ထိုင်မျှော်လင့်နေတာမျိုး မေမေ အားမပေးတတ်ခဲ့ပေမယ့် သူတို့အတွက် မေမေ ထီထိုးပေးကြည့်တာပါ။ သူတို့ ကံ ပါလာလို့ ပေါက်ရင် အားလုံးက သူတို့အတွက်ပဲပေါ့။”

....လို့ ရှည်ရှည်ဝေးဝေး ရှင်းပြမိလိုက်သေး။ သားကြီးကတော့ သူ့အမေကို စောင့်ကြည့်ချင်နေတဲ့ပုံ။ ငါ့အမေ ထီတကယ်ပေါက်ရင်ရော... တကယ်လှူပါ့မလားပေါ့လေ..။ ငါမုန့်ဖိုးရတဲ့ ပိုက်ဆံလေးတွေ အပ်ထားတောင် ပြန်မပေးသေးပဲနဲ့ ... ဘာညာတွေးနေမှာပေါ့ (ဟုတ်လား)။

ထီဖွင့်တော့ တိုက်ကြည့်လိုက်သေးတယ်။ ဒါပေမယ့်.... သူတို့တွေနဲ့ ကျမ ကံ မအပ်စပ်ခဲ့ဘူးနဲ့ တူပါရဲ.။ ထီကပေါက်မလာဘူးလေ..။ အဲဒီလိုပဲ အမေ့ကို အပြောနဲ့ အလုပ် ညီပါ့မလားလို့ မျက်စေ့ဒေါင့်ထောက် လိုက်ကြည့်နေခဲ့တဲ့ သားကြီးလည်း ..... အဲဒီမှာတင် တစခန်းရပ်သွားရပါတော့တယ်။ ။