K- မမ နဲ့ ကျမ ..

သဇင်အမှတ်တရတွေနဲ့ ကျမ ဘလော့ဂ်ကို လာကူညီပေးနေတဲ့ သူငယ်ချင်း K-မမ ကို ကျေးဇူးတင်နေမိတယ်။ သူ့ကို ကျမ အခုမှ အပူကပ်ခဲ့တာ မဟုတ်ပါဘူး။ ဟိုး သဇင်မှာ မနုးမနပ် မလည်မ၀ယ် အူကြောင်ကြောင် အဆောင်သူ ဘ၀ ထဲကပဲ ဆိုပါတော့။

ကျမ အာအိုင်တီ တက်ခွင့်ရတော့ အိမ်က လိုက်ပို့ကြပါတယ်။  ဖေဖေ တာဝန်ကျနေတဲ့ တောင်ငူကနေ ရန်ကုန်ကို ကားနဲ့ ဆင်းလာကြတာ...။ လမ်းမှာ..ပဲနွယ်ကုန်းအရောက် နေ့လည်စာ ၀င်စားတော့ ထမင်းဆိုင်က လူတွေနဲ့ စကားစပ်မိရင်း သူတို့ဆိုင်ရှေ့က ရဲစခန်းက ဦးတင်အောင်ရဲ့ သမီး “မမ” ဆိုတာလည်း အာအိုင်တီ ၀င်တယ်ဆိုတာ ကြားခဲ့ရ။ အဲဒါ လူချင်းမသိခင်ကတည်းက သူ့နံမယ်ကို သိခဲ့ရတာ။

အဆောင်ဝင်ပြီး အိမ်က လူကြီးတွေက နေရာချပေး.(အဲ..လူနေရာချတာ မဟုတ်၊ ပစ္စည်းတွေ နေရာချပေးပြီး) ပြန်သွားတော့ တစ်ယောက်ထဲ ယောင်တောင်တောင်ရယ်။ အခန်းထဲကနေ အပြင်  ချက်ချင်းမထွက်ရဲသေး။ ရိုးလ်ကောလ်ကို ဘယ်မှာခေါ်လို့ ဘယ်သွားရမယ်မှန်းမသိ။ ဒါနဲ့ အဆောင်မပိတ်ခင် အခန်းအပြင်ဘက် ချောင်းကြည့်ပြီး စနည်းနာဖို့ အထွက်.... မျက်နှာချင်းဆိုင်အခန်းက ဆံပင်ရှည်ရှည်နဲ့ ကောင်မလေးတစ်ယောက် ဓာတ်ဘူးကိုင်ပြီး သူ့အခန်းကို ဖွင့်အ၀င်..။ သူခေါ်လို့ သူ့ကုတင်မှာထိုင် စကားပြောရင်းနဲ့မှ လမ်းမှာ ကျမ ကြားခဲ့ရတဲ့ နံမယ်ပိုင်ရှင် ကိုး။ အဆောင်မှာ ကျမ ပထမဆုံး စ သိကျွမ်းခဲ့တဲ့ သူငယ်ချင်း....။

ကျမတို့ ရောက်ကာစ လမ်းကလည်း ထွက်ချင်ချင်.. မသွားတတ် မလာတတ်သေးခင် သူနဲ့ ကျမ .. တညနေမှာ သူက ၆-မိုင်ခွဲက မိန်းကလေး အပြင်ဆောင်က သူ့သူငယ်ချင်းတစ်ယောက်ဆီ သွားမယ်တဲ့။ သူရော ကျမရော မသိဘူး။ အေး.. ငါ့အစ်မ တစ်ယောက်လည်း ရှိတယ်.. လိုက်ခဲ့မယ်လို့ ကျမ ပြောလိုက်တယ်။ ကျမကလည်း အင်းလျားလမ်းက အဖွားအိမ်ကို ဘာရယ်မဟုတ် သွားချင်နေတာကို သူ့ကို လိုက်ခဲ့ပေးဖို့ ခေါ်... ကျမတို့နှစ်ယောက်လည်း အဖွားအိမ်က အပြန် ၆မိုင်ခွဲက အပြင်ဆောင် ၀င်မယ်ဆိုတဲ့ သဘောတူညီချက်နဲ့ ထွက်လာကြတာပေ့ါ။ 

ကျမ အဖွားအိမ်ဆိုတော့ လမ်းသိသူက ကျမ... ၄၅-လိုင်းကားတွေ ရောက်တယ်ဆိုတာ သိပေမယ့် ကားကြပ်နေလို့လား၊ ဆင်းရမယ့် မှတ်တိုင်မသိလို့လား မသိ.. မစီးဖြစ်ကြပဲ.. အဆောင်ကနေ ပြည်လမ်းဘက်ထွက်...။ အင်းယားကန်ဘက်ကူး။ အင်းယားကန်ဘောင်ပေါ် တက်လျှောက်။ ကွန်ဗို့ကေးရှင်း၊ လှေလှော်အသင်း... အဲ..အင်းယားလမ်းအတုိင်းလျှောက်လာ... သူ တော်တော်မောလာပြီ.. 

ဟေ့ကောင်.. မရောက်သေးဘူးလား..

အင်း..ရောက်တော့မယ်.. ရှေ့နားဆိုရောက်ပေါ့...။

လမ်းဆက်လျှောက်လာကြ... ။ အင်းလျား... ရတနာ..အင်းလျားလမ်း မီးပွိုင့်နားရောက်တဲ့ အထိ...။

“ဟေ့ကောင်ရေ.. မောပြီကွာ.. မရောက်သေးဘူးလားဟ”

“ရောက်ပါပြီဟာ..နင်ကလည်း.. မီးပွိုင့်ကျော်ရင် ရောက်ပြီ...”

မီးပွိုင့်ကိုဖြတ်.. လမ်းကူး.. တခြံ..နှစ်ခြံ.. သုံးခြံ... မရောက်သေး..။

သူ့ဆီက အသံမထွက်တော့..။ ဟိဟိ..ဒေါကန်နေပြီ။

ကဲ..ကဲ..ရောက်ပြီ။ ဒါ ငါ့အဖွားအိမ်ပဲ။

မားမားက ဘာတွေတိုက်လို့ ဘာတွေ ကျွေးလိုက်သလဲတော့ မမှတ်မိတော့.. ရေတောင်းသောက်ခဲ့မှာတော့ အသေအချာပဲ.. ဟဲဟဲ။ အပြန်ကျတော့လည်း လာရာလမ်းအတိုင်း ဒုန်းစိုင်းပြီး ပြန်ရပြန်ပါတယ်။ အဆောင်ပိတ်ချိန် မမီမှာစိုးလို့။ ဘယ်..သူ့သူငယ်ချင်းအဆောင်လား ... ဘယ်ဝင်ဖြစ်ပါ့မလဲ..။ သူများတကာတွေ ကန်ဘောင်မှာ အေးအေးဆေးဆေး စတိုင်လေးနဲ့ လေညှင်းခံ လမ်းလျှောက်ထွက်နေတဲ့ အချိန် ကျမတို့က ချွေးသံတရွှဲရွှဲနဲ့ အပြေးတပိုင်း...။ လမ်းကလည်း မြန်မြန်လျှောက်ရလွန်းလို့ ဗိုက်တွေတောင် အောင့်ပေါ့။ သူလည်း အဲဒါကို မမေ့ပါဘူး။ ကျမ သူ့နှိပ်စက်ခဲ့တာကိုလေ...။ ဟား ဟား

နောက် ကျမနဲ့ တွဲတဲ့ သူငယ်ချင်းတွေ ရန်ကုန်သင်္ကြန်ကျဖို့ ရန်ကင်းအိမ်မှာ နွေရာသီ စုနေဖူးသေးတယ်.. ဘယ်နှစ်လဲတော့ မမှတ်မိတော့ဘူး။ ကျမတို့ ဆိုတာက တပ်ကုန်းသူ မိုးထွန်း၊ တောင်ငူသူ မသင်းကြည်၊ နတ်တလင်းက စန္ဒာ..။ အဲဒီတုန်းကလည်း K မမ ရောက်လာတာပဲ။ လမ်းထိပ်လောက်ကထဲက သိင်္ဂီ ရေ..ဆိုပြီး ငိုချင်သံကြီးနဲ့ အော်လာတာ.. ကျမတို့မှာ စိုးရိမ်တကြီး အပြေးတပိုင်း သွားကြိုရတဲ့ ရွှေဧည့်သည်ပါ.. (ဟား ဟား ဘာဖြစ်လို့ အော်လာတာလဲ မေးရင် ဘယ်လိုဖြေရပါ့)

နောက် မှတ်မှတ်ရရ တစ်ခု..။ ၁၉၉၀ ၀န်းကျင်..ကျောင်းတွေ ပိတ်ထားတဲ့ အချိန်ပေါ့။ ရန်ကုန်မှာ လ္ဘက်ရည်ဆိုင်ဖွင့်ထားတဲ့ MNK ရယ်၊ မန္တလေးကနေ ရန်ကုန်  ခဏရောက်လာတဲ့ KKNရယ်၊ ရန်ကုန်ကို ပြောင်းလာပြီ ဖြစ်တဲ့ ကျမရယ်...K-မမရယ် (သူလည်း ဘာအတွက် stay ရှောင်ရင်း ရန်ကုန် ရောက်နေခဲ့လဲ မသိ)။ ဘောက်ထော်ဘက်က စားသောက်ဆိုင် တစ်ဆိုင်မှာ လေးယောက်သား ဆုံဖြစ်ရင်း စုရင်း စားရင်း စကားတွေ ပြောဖြစ်ကြတယ်။ ဖွင့်ထားတဲ့ သီချင်းတွေက စိုးလွင်လွင်ရဲ့ သီချင်းတွေ...။ 

လျှို့ဝှက်လွန်းတဲ့ မျက်ဝန်းလဲ့ပြာရီမှာ ချစ်ခွန်းဖွဲ.သီဆို ပါမယ် မေ.. ကိုယ့်ဘက်က  .....ဆိုင်ချင်ပေမယ့် သူ့ဘက်က မပိုင်သေး.. ဝေးနေရတဲ့ အခိုက်မှာ..လွမ်းနေရမှန်း သိရဲ့လားလေ...

ခံစားချက်တွေ တိုက်ဆိုင်တဲ့ အခါ စာတွေ ကဗျာတွေ သီချင်းတွေက ပိုပီပြင်လာတတ်တာကိုး။ 

ငှက်ကလေးက ဘီယာသောက်တယ်။ သူလည်း တစ်ခွက် လိုက်သောက်တာ မှတ်မိနေတယ်။ ကျမ ကတော့ မီးခိုးငွေ့တွေ ခြုံပြီး ပုန်းနေတဲ့ KKN ဆီက စီးကရက်တွေ တစ်လိပ်ပြီး တစ်လိပ် ယူသောက်ဖြစ်ခဲ့တယ်။ ဟုတ်တယ်.. ကျမ ရင်ကွဲနေခဲ့တဲ့ အဲဒီ အချိန်မှာလည်း သူ... ရှိနေခဲ့တယ်။

ဘာမှ မမေး ...ဘာမှ  မပြောခဲ့တာတွေအတွက်..ခုချိန်ထိ ကျေးဇူးတင်တယ် မမ။