အသွင်တူ၏၊ မတူ၏ (Tag)

(သူငယ်ချင်း သက်ဝေက ချစ်လို့ တက်ဂ်တဲ့ ပို့စ်ကို ချစ်သောအားဖြင့် ရေးပါသည်။ အမှတ်တရ တက်ဂ်လို့ ကျေးဇူးပါ..သူငယ်ချင်းရေ.)

အသွင်တူ၏ မတူ၏ တဲ့။

အသွင်မတူ အိမ်သူ မဖြစ်ဆိုတဲ့ စကားကို နားလည်တာကတော့ လိုက်ဘက်ညီတဲ့ အိမ်ထောင်ဘက်တွေကို ပြောချင်တယ်လို့ ထင်တာပါပဲ။ ဆိုပါတော့....တယောက်က ဂီတာတီးရင် တယောက်က သီချင်းဆို...(ချိုသင်းတို့လို)၊ တယောက်က ဘလော့ဂ်ရေးရင် နောက်တယောက်က အားလည်းပေး ၊ ကိုယ်တိုင်လည်းရေး...( ဒါက ကိုဧရာ+မသီတာ စုံတွဲ)၊ နောက် အစ်မမေငြိမ်းတို့လို တယောက်က စားပင် ပန်းပင်တွေစိုက်.. တယောက်က အဲဒါတွေနဲ့ ပန်းအိုးထိုးအလှဆင်.... အဲ... သူငယ်ချင်း သက်ဝေကရော... တယောက်က အနုပညာစွမ်းအားအပြည့်နဲ့ ဖန်တီးလက်စွမ်းပြတဲ့ အခါ တယောက်က မော်ဒယ်လုပ်ပေး..... (ဒါက သက်ဝေပို့စ်ထဲမှာ မပါဘူး..)နောက်ပြီး နံပါတ်နဲ့ ဂဏန်းတွေကို မမှတ်မိတတ်တဲ့ သူနဲ့ နောက်တယောက်က အကုန်လုံးမှတ်မိနေတတ်တဲ့ မခင်မင်းဇော်တို့ စုံတွဲ... ကဲ..ဘယ်လောက်တောင် လိုက်ဖက်ညီတဲ့ စုံတွဲတွေပါလိမ့်နော်....။

နေဦး.... သူများရေးထားတဲ့ ပို့စ်တွေ ဖတ်ပြီး အားကျနေရုံနဲ့ မပြီးသေးဘူးလေ..ကိုယ်ပေါင် ကိုယ်လှန်ထောင်း.. အဲ.. ကိုယ့်အကြောင်း ကိုယ်ရေးရမှာတဲ့...။

စပြောရရင်တော့ ချစ်သူသာဖြစ်ခဲ့ကြတယ်...ကျမတို့နှစ်ယောက်က အသွင်တူတဲ့ သူတွေ မဟုတ်ခဲ့ပါဘူး။ သူက အရပ်မြင့်မြင့် ဆံပင်ရှည်ရှည် မိန်းကလေးပီပီသသ ကောင်မလေးတွေကို သဘောကျသတဲ့.... ကျမ စိတ်ကူးထဲမှာ ရှိရမယ့် အမျိုးသားကတော့ဖြင့် တည်တည်တံ့တံ့ အေးချမ်းတည်ငြိမ်ပြီး လူကြီးဆန်တဲ့ ပုံစံမျိုး..(အဲဒီတုန်းက ပြောပါတယ်)။ သူ့ဘေးနားမှာ အရပ်ခပ်ပြတ်ပြတ် ဆံပင်ကောက်ကောက်ပွပွနဲ့ နုူးနူးညံ့ညံ့ မိန်းကလေးပုံစံ မပေါက်တဲ့ ကျမ ရောက်နေခဲ့ရတဲ့ အဖြစ်ရယ်.... နောက်နောက်ပြောင်ပြောင်နေတတ်ပြီး ကျယ်လောင်စွာ ရယ်မောရင်း ပေါ့ပါးလွတ်လပ်စွာ နေတတ်တဲ့ သူ့ကိုမှ ကျမဘဝရဲ့ မရှိမဖြစ် အလိုအပ်ဆုံးအရာ ဖြစ်နေခဲ့ရတဲ့ အဖြစ်ဟာ....ထူးဆန်းလွန်းတဲ့ တစုံတရာရဲ့ လှည့်ကွက်ပေါ့လေ...။

အစွန်းနှစ်ဖက်က လူနှစ်ယောက်လိုပါပဲ... အသွင်မတူတာတွေထက် ဆန့်ကျင်ဖက်အရာတွေ များခဲ့တယ်။

ကျမက အလေးအနက်ထားလွန်းတဲ့ အရာတွေက သူ့အတွက် ဘာမှ သိပ်မဟုတ်ခဲ့ဘူး။

ကျမက လူတွေနဲ့ မရင်းနှီးလွယ်သလောက် သူကတော့ တွေ့တဲ့ သူတွေကြား ပျော်ဝင်သွားတာပါပဲ။ အရင်ကဆို လက်ဖက်ရည်ဆိုင်ထိုင်ရင် ကိုယ့်ထားခဲ့ပြီး သူငယ်ချင်းတွေဝိုင်းမှာ သွားထိုင် လေဖေါရင်း ကျမကို မေ့ထားလေ့ရှိတဲ့သူ....။

တစုံတခုကို တယောက်ယောက်အတွက် ရည်ရွယ်ထားပြီဆိုရင် အဲဒီသူဆီအရောက်ပေးပြီး အဲဒီသူကိုသာ သုံးစေချင်တဲ့ အစွန်းရောက်စိတ် ရှိတဲ့ ကျမနဲ့  သူ့အတွက်ကျတော့  အစွဲသိပ်မထားပဲ လူတိုင်းအတွက် ရည်ရွယ်သည်လို့ အားလုံးကို စေတနာရှိတတ်တဲ့ သူရဲ့ စိတ်စေတနာ....(သိပ်တော့နားမလည်ဘူး၊ သေချာတာကတော့ ကျမလို  သူ့မှာ bias မရှိတာ...)

ကျမက နဲနဲ စိတ်ကူးယဉ်ဆန်ချင်သား... သူ့ဆီက romantic ဆန်ဆန် လက်ဆောင်ပစ္စည်းတွေ ဘာတွေများရမလားလို့. စိတ်ကူးနေတဲ့ အချိန် သူကတော့ တကယ်အသုံးလိုမယ့် ပစ္စည်းမျိုးပဲ ပေးတတ်ပြန်ရော.. ကျမတို့ အထိမ်းအမှတ်နေ့တွေဆို ထုံးစံလိုကိုဖြစ်နေတာက.. ဘုရားဖူး၊ အလှူ အတန်းလေးလုပ်၊ ပြီး ညကျ မိသားစုတွေ ဆုံပြီး အစားအသောက်တွေ စားကြမယ်..နောက်ဆုံးတော့ ကလေးတွေ ပျော်ရအောင် ကိတ်မုန့်ကို ဖယောင်းတိုင်ထွန်းပြီး မီးမှုတ်ကြမယ်...ဒါပဲ....တခါတော့ သူ့ကို ရှင့်ဆီက ပန်းစည်းလေး ဘာလေးများ တခါမှ မရဖူးဘူးလို့ နောက်လိုက်မိတာ...နောက်ပိုင်း ပန်းစည်းတွေချည်းပဲ လက်ဆောင်ရတော့တာပါပဲ။ ဒါနဲ့ ကမန်းကတန်း ပြန်တားထားရပြန်ရော.....။

ကျမက အွန်လိုင်းမှာ သူငယ်ချင်းတွေနဲ့ ဂျီတော့ခ်ကနေ ချက်တင်ပြောတာ ပေါ့ပါးလွတ်လပ်သလောက် ဖုန်းကိုတော့ ဆက်ခဲပါတယ်။ ကျမဖုန်းက စကားပြောတဲ့ function ထက်.. သီချင်းနားထောင်...ဓာတ်ပုံရိုက်၊ to do list တွေမှတ်တဲ့ ကိစ္စတွေမှာ ပိုအလုပ်ဖြစ်ပါတယ်။ သူကတော့ ... ဖုန်းရင်လည်း ဘက်ထရီအားကုန်မှ၊ သူဆက်ရမယ့် လူစာရင်းလည်း ကုန်ပါမှ၊ ဖုန်းရင်လည်း ဧရိယာပြင်ပ ရောက်နေပါမှ၊ အဲ... သူလည်း အိပ်ပျော်ပါမှ...။ ဖုန်းလာရင် ချက်ချင်းကောက်ကိုင်တတ်တဲ့သူက ဂျီတော့ခ်က တုံ ဆိုပြီး တက်လာရင် ဂရုတစိုက် ဖြေချင်မှ ဖြေတတ်တာ... စကားပြောဆက်သွယ်ရတာမျိုးကို ပိုသဘောကျတာထင်တယ်...။ 

အစားအသောက်ဆိုရင်... သူက အကောင်းကြိုက် အစုံစား။ မုန့်ဟင်းခါးဆို ရှိသမျှ အကုန်ထည့် ရသပေါင်းစုံနဲ့ စားတတ်တာ ကျမဖြင့် အံ့သြရော....။ ကိုယ်ကကျ ပဲကြော်နဲ့ တပွဲ က ဆိုင်သာပြောင်းသွားမယ်.. မုန့်ဟင်းခါး စားတဲ့ format က ဘယ်တော့မှ မပြောင်း။ ပဲကြော်မရှိရင် အလွတ်ပဲ ပေးဆိုတဲ့ သူမျိုးကို။ 

ကျမက ကိုယ်တပ်ထားတဲ့ မျက်မှန်နဲ့သာ လောကကြီးကို ကြည့်တတ် မြင်တတ်ပေမယ့် သူ လူတွေရဲ့ မတူညီမှုတွေကို နားလည်လက်ခံပေးနိုင်တာကို ကျမ အားကျမိပြန်ရော.... ဒေါသစိတ်လွန်ကဲပြီး ပေါက်ကွဲလွယ်တဲ့ ကျမအဖို့ သူနဲ့ အသွင်တူမယ်ဆိုရင်တော့ တော်တော်ကို နေတတ်ပြီး ငြိမ်းချမ်းမှု ရနေမှာပါ။

ခုတော့လည်း ကျမတို့ နှစ်ယောက် အရင်ကလောက် အသွင်မတူတာတွေ မရှိတော့ပဲ အစွန်းနှစ်ဖက်ကနေ အလယ်မှာ လာဆုံနေမိကြပြီလို့ ထင်ပါတယ်။ ဒါကလည်း အသွင်တူလာတာမျိုး မဟုတ်ရင်တောင် တယောက်နဲ့ တယောက် အနှောင့်အယှက် မဖြစ်စေချင်တဲ့ စိတ်စေတနာတွေကြောင့် ပြောင်းလဲလာခဲ့ကြတာ .. ဒီလိုမှ မဟုတ်လည်း လက်ခံပေးလိုက်တာဖြစ်မှာပါ။ 

နောက်ဆုံး ကောက်ချက်ချရရင်တော့ အသွင်တူတာ မတူတာထက် တယောက်နဲ့ တယောက် အပြန်အလှန် လေးစားနားလည်နိုင်မှုရယ် ... မေတ္တာကဲတဲ့ ချစ်ခြင်းတရားရယ်နဲ့ဆို တူညီတဲ့ တန်ဖိုးထားမှုတစ်ခုကြောင့် အသွင်မတူလည်း အိမ်သူ ဖြစ်ကောင်းပါရဲ့လေ....။