၁၁၂၇

၂၅.၁၂.၂၀၁၄ 

ဒီဇင်ဘာ.... ပြက္ခဒိန်တခုရဲ့ နောက်ဆုံးလ... နှစ်တနှစ်ကို နောက်ပြန်လှည့်ကြည့်ရင်း ရှေ့တနှစ်ကို ခရီးဆက်ဖို့ နောက်ဆုံးခြေလှမ်းတလှမ်း.....။

လွမ်းရသားပဲ ဒီဇင်ဘာရယ်... ဘာရယ်မဟုတ်... ပွင့်လင်းတဲ့ရာသီ... ခရီးအသွားအလာများတဲ့ ရာသီ... သူများတွေကို ကြည့်ရင်း ကိုယ်တွေလည်း ဘာလုပ်ရကောင်းမလဲ ယောက်ယက်ခတ်တဲ့ ဒီရာသီလေ...။

ကိုယ် ပြန်မလှန်ဖြစ်တဲ့ ဘလော့ဂ်က သဇင်ကို အလွမ်းပြေ စာတွေ ပြန်ဖတ်ရတယ်။ သူငယ်ချင်း ခင်မမနဲ့ ရေးခဲ့တုန်းက စာလေးတွေ ပြန်ဖတ်မိတော့ အဲဒီအချိန်တုန်းက အကြည်ဓာတ်လေးတွေကို ပြန်ခံစားမိတယ်။ စာရေးကောင်းတဲ့ သူငယ်ချင်းစာကို ဖတ်ပြီး ရယ်မော ပြုံးရွှင်ရင်း အဲဒီ့အချိန်လေးကို သတိတရ လွမ်းမိတယ်။ ဘလော့ဂ်ပေါ်မှာ ကိုယ့်အကြောင်းတွေ သိပ်မသိတဲ့ မိတ်ဆွေတွေ လာဖတ်တာကို ရှက်ရကောင်းမှန်း မသိပေမယ့် ဖဘပေါ်မှာ ကိုယ်တွေအကြောင်း ကျောင်းက အကြောင်းသိတွေ သိကုန်တာတော့ (နဲနဲ မဟုတ်) များများ မျက်နှာပူမိတယ်။  ဒါပေမယ့် အသက်တွေလည်း ကြီးလာတော့ ရှက်လည်း (သူငယ်ချင်း ဘိတ်သူ လေသံနဲ့ဆို) မျက်ခွက်တော်တော်ပြောင်နေပြီ..... သူငယ်ချင်းရဲ့ အရေးအသား ခပ်သွက်သွက်ကို ကျောင်းက သူငယ်ချင်းတွေ သတိထားမိကုန်ကြတာ အရေးမဟုတ်.... သူက ဘလော့ဂ်လုပ်ထားတာ မဟုတ်ပဲ အပျင်းပြေ ကိုယ့်ဘလော့ဂ်ထဲ လာရေးတာဆိုတော့ မတော် ကိုယ် ပေါက်တတ်ကရ လျှောက်ရေးထားတဲ့ ဘလော့ထဲ ရောက်လာရင် ကိုယ် အရှက်ကွဲမှာလည်း တွေးပူမိသေးတယ်။ သူကတော့ ကုန်ကြမ်းတွေများပြီး ရေးစရာတွေ ပုံနေတော့ စာတွေ ရေးဦးမယ်လို့ ကြွေးကြော်နေရင်း ဖဘပေါ်မှာ ရင်တွင်းဖြစ်တွေ ဆက်တိုက်ရေးလို့... ကိုယ့်မတော့ ရှိတဲ့ ဘလော့ဂ်လေး ဖုန်တောင် မခါနိုင်တာတောင် ကြာ... သူများတွေ blog challange တွေ လုပ်လည်း ကိုယ့်မှာ မရေးနိုင် မရေးအား ရေးလို့ မထွက်.... 

ခုတလော စဉ်းစားမိနေတာ....

လူတွေရဲ့ စိတ်တွေ ဘယ်လို ပြောင်းလဲသွားသလဲဆိုတာ စိတ်ဝင်စားနေမိတယ်။ ကိုယ့်စိတ်တွေရဲ့ အကြိုက်တွေ သိသိသာသာ ပြောင်းလဲလာတာကို သတိထားမိပေမယ့် ဘယ်လို အဆင့်ဆင့် ပြောင်းလဲလာသလဲဆိုတာကို မသိလိုက်ဘူး။

အကြောင်းတရားတွေက မမြဲလို့ အကျိုးတရားတွေကလည်း မမြဲပေဘူးတဲ့....

မမြဲတဲ့ တရားတွေကို တည်တံ့ ခိုင်မြဲအောင် အတင်းကြိုးစားနေတာဟာ မိုးကြိုးပစ်တာကို ထန်းလက်နဲ့ ကာသလို ဖြစ်နေမှာ သေချာပါရဲ့။

Merry X'Mas and Happy New Year To All.......

http://holidayswishes.net/wp-content/uploads/2014/10/Merry-Christmas-and-happy-new-year-HD-candle-wallpaper-2015.jpg

http://christmas2014newyear2015.com/wp-content/uploads/2014/11/Happy-new-year-2015-pictures-free-download.png