သဇင်အမှတ်ရများ - ကိုယ်နှင့် လှဧကရီ (၃) ( ရေးသားသူ- K-မမ)

၃။ ဆံပင်ဖြူ နှင့် လှဧကရီ

ခေါင်းစဉ်ကြည့်ပြီး မလန့်သွားပါနဲ့။ လှဧကရီက ပြစ်မျိုးမှဲ့မထင် ပါ။ ဆံပင်ဖြူတာ ငါပါ။ နင်တို့သိတဲ့အတိုင်း ငါဟာ သူများနဲ့မတူ နည်းနည်းလေးတော့ သဘာဝနဲ့ လွဲနေတတ်ပါတယ်။ ရေဦးသူ TMG ကတော့ "နင်က အားလုံး ပုံမှန်မဟုတ်တာ။ စိတ်ကအစ" ဆိုပြီး နှိပ်ကွပ်တတ်ပါတယ်။ 

ငါ့ရဲ့ ငယ်ဘဝ ၁-တန်းမှ ၃-တန်းထိ ရှမ်းပြည်အရှေ့ခြမ်း နယ်စပ်မြို့လေးမှာ မူလတန်းပညာကို သင်ယူခဲ့ရတာပါ။ ဆရာ မပြည့်စုံတော့ နေ့စဉ် ကျောင်းသင်းပုန်းကြီးပေါ်မှာ ရေးထားတာ ကူးရေးရင်ကူး၊ ဒါမှမဟုတ် ဖတ်စာအုပ်ထဲက စာပုဒ်ကို ကူးရေးရင်ကူး၊ ဒါမှမဟုတ် စာသင်ခန်းထဲမှာပဲ ဆော့ရင်ဆော့ပေါ့။ အမြဲတမ်းရှိတဲ့ဆရာမတစ်ယောက်နဲ့ ကျောင်းအုပ်ဆရာကြီးတို့က သူငယ်တန်းမှ စတုတ္ထတန်းထိ ဒါကူး၊ ဒါဖတ်နေ ဆိုပြီးခိုင်းခဲ့ပြီး တတန်းဝင်တတန်းထွက် တာဝန်ယူခဲ့ကြတာပါ။ ကျောင်းအုပ်ဆရာကြီးက စတုတ္ထတန်းကို ပို အဓိကထားသင်ပါတယ်။ ပြည်မ  က (ရှမ်းပြည်က လူတွေကတော့ ဗမာပြည်လို့ခေါ်ပါတယ်။) ဆရာမ ၂-ယောက်တော့ရှိပါတယ်။ များတော့အားဖြင့် လေယာဉ်အစီအစဉ် မရှိလို့ ကျောင်းဖွင့်ချိန်အမှီမလာနိူင်တာ များပါတယ်။ အပိုဝင်ငွေအတွက် ဆရာမတွေဟာ သိုးမွေးထိုးတဲ့ အလုပ်ပါ တွဲလုပ်ကြပါတယ်။ စာမေးပွဲဆိုတာလည်း easy going ဆိုသလိုပဲ... ဘာမှန်းကိုမသိပဲ တနှစ်တတန်းတော့ မှန်မှန်ပါပဲ။ 

ကျောင်းကအပြန် အိမ်ရောက် ဘုတ်ကနဲ လွယ်အိတ်ချ ကစားကွင်းထဲ တန်းရောက်သွားတာပဲ။ (မည်သူ့ကိုမှ အပြစ်ဆိုခြင်း မဟုတ်ပါ။ ခေတ်အခြေအနေ၊ ဒေသအခြေအနေ ကိုရေးပြခြင်းသာဖြစ်ပါသည်။) အခုခေတ်ကလေးတွေကြည့်ပြီး ကျောင်း ၊ ကျောင်းပြီးအိမ်၊ အိမ်ရောက် နားတောင်မနားပဲ ကျူရှင်ပြေး၊ ကျူရှင်ကပြန် အိမ်စာလုပ်... အိပ်။ ကစားချိန်ကို မိဘက ကန့်သတ်ထားသေးတာ။ ကံကောင်းတာလား သနားစရာလားတောင် မသိတော့ပါ။ 

၎-တန်းရောက်တော့ အဖေပြောင်းရာ ခေမာရဋ် လို့လဲအမည်တွင်တဲ့မြို့ရဲ့ လေတပ် အ.မ.က ကျောင်းမှာ ကျောင်းအုပ်ဆရာကြီး ဦးအောင်တင် (အမည်မှားရင် ခွင့်လွှတ်ပါ ဆရာကြီး) လက်အောက်မှာ ပညာသင်ကြားရပါတယ်။ စည်းကမ်းကြီးပြီး စာအသင်ပြကောင်းတဲ့ သူပါ။ တနေ့စာ တနေ့မှန်မှန် ပြန်ရပါတယ်။ မရရင် ခုံပေါ်တက်  မတ်တပ်ရပ် စာရရင် အတန်း Monitor ဆီမှာ သွားပြန်ရပါတယ်။ အတန်းထဲမှာ လိမ္မာပြီး စာအတော်ဆုံးသူကိုပဲ ဆရာကြီးက Monitor ခန့်တာပါ။ အဲ ဆော်ပလော်တီးလဲ ခံရတာပဲ။ ငါလဲလန့်ဖြန့်ပြီး စာကျက်ရတော့တာပေါ့။ ဦးနှောက်သုံးမှတ်ရလို့လား မသိဘူး အဲဒီကတည်းကစလို့ ငါ့ရဲ့ ဆံပင်တွေဖြူပါလေရော။ အမေကတော့ ငါ့ကိုငယ်ဖြူလို့ခေါ်ပါတယ်။ ဒါပေမယ့် စာမေးပွဲပြီးလို့ရှိရင်တော့ အဲဒီ ဆံပင်ဖြူဟာ ၂-ပတ်အတွင်းအကုန်ပြန်နက်ပါတယ်။ အဲဒီလို ၄-တန်းကစပြီး စာကျက်ရင်၊ များတော့အားဖြင့်တော့ စာမေးပွဲရာသီတွေမှာ င့ါဆံပင်တွေဟာ ဖြူလိုက်နက်လိုက်နဲ့ အမြဲသံသရာလည်နေတာ အထူးအဆန်း မဟုတ်တော့ပါဘူး။ တကယ်လို့ အခုခေတ်ကလေးတွေလို ဆိုရင်တော့ မူကြိုထဲက ဆံပင်ဖြူလောက်တယ်။

ဆံပင်နဲ့ပတ်သက်ရင် Sensitive ဖြစ်တဲ့ငါဟာ မည်သည့် ဆံပင်တချောင်းမှ နှုတ်လေ့ရှိပါ။ ဆံပင် ကောက်ကောက်ကွေးကွေးလိုမျိုး၊ ကြမ်းကြမ်းနက်နက်လိုမျိုး ကိုတော့ လူအများကဆံယားပင်လို့ ခေါ်ကြတယ်လို့ ထင်ပါတယ်။ အဲဒီလိုမျိုး ကိုတောင် အမေက နုတ်ချင်ရင်တောင် ခေါင်းတခါခါ လည် တခါခါနဲ့ ငြင်းဆန်သူ တစ်ယောက်ပါ။ စာမေးပွဲရက်ရှည်ရင်ရှည် သလို ငါ့ခေါင်းက ဆံပင်အဖြူ အနည်းအများ ဖြစ်လေ့ရှိတာပါ။ ငါ့ခေါင်းက ဆံပင်အဖြူ မြင်ရင်တော့ သူငယ်ချင်းတွေက "ဟိတ်ကောင် မင်း အသက်ကြီးသွားပြီ ဟားဟား" ဆိုပြီးနှိပ်ကွပ်သွားကြတာပါ။ ငါကလည်း "အေး အခါကြီးရက်ကြီးကြရင် င့ါကိုလာ ကန်တော့" လို့ပြန်အနိုင်ယူလိုက်တာပေါ့ ဘယ်ရမလဲ။ 

၃-တန်းမှာ ကျောင်းကြီးရက်ရှည် ( နှစ်ရှည် ) ပိတ်လို့ ပြန်ဖွင့်ပြီး သိပ်မကြာခင် RIT ရဲ့နတ်ကြီးတဲ့ စာမေးပွဲကြီး ဖြန်းဆိုရောက်လာပါရော။ စာမေးပွဲ အတွေ့ကြုံရှိတဲ့ သူရော၊ အခုမှ စာမေးပွဲစဖြေမယ့် ၁-တန်းကလေးတွေရော၊ မေ့တေ့တေ့ဖြစ်နေတဲ့ ကျောင်းစာတွေကို တလတာ ဖုတ်ပူမီးတိုက် ပြန်နွှေးရတော့ တထိတ်ထိတ်တလန့်လန့် စာမေးပွဲကြီးအတွက် ပြင်ဆင်ရပါတော့တယ်။

တကယ်စာမေးပွဲဖြေရော..... ထင်ထားသလိုမဟုတ်ပဲ RIT ရဲ့အစဉ်အလာကိုဖောက်ပြီး ကျောင်းသားအားလုံးနီးပါး ဖြေနိူင်အောင် မေးထားတဲ့ မေးခွန်းတွေဖြစ်နေတာပါ။ RIT ရဲ့မေးခွန်းလွှာတွေဟာ ကမ္ဘာ့ စံမှီခဲ့တယ်လို့ ဆိုပါတယ်။ သိင်္ဂီရေ လိုရင်းမရောက်ဘူးလို့ မအောက်မေ့ပါနဲ့ကွယ်။ သဇင်အကြောင်း မှတ်တမ်းလေး Blog မှာရှိချင်လို့ပါလို့ နင်ဆိုခဲ့သလို ငါတို့ဖြတ်သန်းခဲ့တဲ့ ကျောင်းတော်ကြီးကလည်း သဇင်နဲ့အတူ ဒွန်တွဲနေမှာပါပဲလေ။ စာမေးပွဲကြီးနဲ့အတူ စာမေးပွဲနဲ့ဆိုင်တဲ့ ပုံပြင်လေးတွေဟာလဲ တနေ့တမျိုး မရိုးရအောင် စိတ်မကောင်းစွာ ကြားနေရတာပါပဲ။ 

ငါတို့ထက် တစ်တန်းဂျူနီယာ ဖြစ်တဲ့ ဇီဝက(သို့) စဥ့်ကူဆောင်က ကောင်းလေးတယောက်ဆို မအိပ်မနေ စာကြည့်ရာကနေ စာမေးပွဲဟာ မထင်မှတ်ပဲ သိပ်လွယ်နေတော့ အိပ်ဖို့လုပ်တော့ အိပ်မရလို့ဆိုပြီး အိပ်ဆေးသောက်လွန်သွားတာ။ နောက်တယောက်ဆို မေးခွန်းဖတ်ပြီး အခန်းစောင့်ဆရာမကိုခေါ်ပြီး တရေးနိူး ထဖြေတာတောင် ရနိူင်ကြောင်း၊ ပါမောက္ခကိုခေါ်ပေးပါ အခုခဏ အိပ်ပြီး အိပ်ယာထမှ ဖြေလိုကြောင်းတွေ ကြားနေရတယ်။ အမှတ်အနည်းအများလိုက် အောင်စာရင်းထွက်သလို နောက်နှစ်အတွက် ခုံနံပါတ်ဟာ အောင်စာရင်းအတိုင်းဖြစ်တာ RIT ရဲ့ထုံးစံ တခုပါ။ တချို့ ခုံနံပါတ်ထိပ်ဆုံးက သူတွေကတော့ စာသင်ရက် စာကျက်ရက်နည်းခဲ့တဲ့အတွက် ခုံနံပါတ် အမှတ်စဉ်များသွားမှာ စိုးရိမ်ပြီး ခဏတာ စိတ်နှောက်သွားကြသလို၊ မသာမာတဲ့နည်းသုံးလို့ စာသင်နှစ် တနှစ်နားလိုက်ရတာတို့ကိုလည်း ဝမ်းနည်းစွာ၊ ယူကြုံးမရစွာကြားခဲ့ရတဲ့ ဖြစ်ရပ်မှန်တွေပါ။ ဒါတွေဟာ ဘာကြောင့်လဲ။ ဗမာပီပီ ကံကိုသာ ယိုးမယ်ဖွဲ့လိုက်ပါတော့တယ်။

ငါ ကတော့ စာမှာ အာရုံစိုက်လေ ဆံပင်ပိုဖြူလေပေါ့။ ငါက စာကို မနက်အစောထ မကြည့်တတ်ပါ။ ညဘက် ၂-နာရီ၊ ၃-နာရီထိကြည့်ပြီး နောက်နေ့ ၁၂-နာရီ၊ နေ့လည် ၁-နာရီထိ အိပ်တတ်သူလေ။ တစ်ရက် လှဧကရီဟာ ၁-တန်း၊ ၂-တန်းမှာ သူ့အခန်းဖော်ဖြစ်ခဲ့သူ ရေဦးသူ TMG ကိုလွမ်းလို့ လား၊ ဒါမှမဟုတ် ဦးနှောက်ဆေးတဲ့အနေနဲ့လား ရယ်သံတွေ အမြဲဖုံးလွမ်းနေတဲ့ ငါတို့ သုံးယောက်နေတဲ့ အခန်းကျယ်ကို အလည်လာခဲ့ပါတယ်။ အဲဒီအချိန်မှာ ငါကတော့အိပ်မောကျလို့ပေါ့။ သူလာတာ သူပြန်သွားတာ သူဘာလုပ်ခဲ့သလဲ ဆိုတာတော့ ငါ့စားပွဲပေါ်မှာ သူရေးပြီး တင်သွားတဲ့ စာအရ အတိအကျကို သိလိုက်ရပါတော့တယ်။ 

"ဟိတ်...အိပ်ပုတ်ကြီး

နင့်ခေါင်းက ဆံပင်ဖြူ အချောင်း ၂၀ တိတိနှုတ်သွားတယ်။ ထတော့။

ပုံ-  သင်းကြည်"

ဆံတပင်တင်း ချစ်ခြင်းမယားလို့ ဆိုးရိုးစကားအရ ဆံပင်တစ်ပင် နှုတ်ခြင်းဟာ မယားထိ ဓါးကြည့်ဆိုသလို အသဲခိုက်အောင်နာတယ်လို့ နားလည်ထားတဲ့ ငါကတော့ အိပ်မက်ထဲမှာ လှဧကရီ နတ်သမီးလေး Massage လုပ်နေတယ်ထင်ပြီး အချောင်း ၂၀ တိတိ နှုတ်သွားတာကို လုံးဝမသိခဲ့ပါ။ သူလေးကတော့ နဂိုကမှ ပုံမလာတဲ့ ငါ ဆံပင်ဖြူကြောင့် ပုံပိုဆိုးသွားမှာ စိုးပြီး သူလို လှလှပပလေး ဖြစ်လိုစေတဲ့ စေတနာနဲ့ လုပ်ဆောင်ခဲ့ပေမယ့် ငါကတော့…… ။

စာရွက်ဖြူဖြူလေးပေါ်မှာ အမြစ်ဖြုဖြုလေးတွေနဲ့ တွယ်ကပ်နေတဲ့ ဆံပင်ဖြူဖြူလေးတွေကိုကြည့်ပြီး သစ်ပင်တွေလို မြေ(ခေါင်း)ဆွတူးပြီး ပြန်စိုက်လို့လဲမရ။ ဒါတွေဟာ နောက် ၂-ပတ်ကြာရင် ပြန်နက်တာလို့ တတွတ်တွတ်ပြောနေတဲ့ ငါ့ကိုကြည့်ပြီး နေ့လည်စာ ထမင်းစားဖို့ပြင်နေတဲ့ ရေဦးသူ ၂-ယောက်ရယ်၊ မြစ်ကြီးနားသူ ကေသွယ်ရယ်ကတော့ မပြိုင်လိုက်ရတဲ့ပွဲမှာ အလဲထိုးခံလိုက်ရတဲ့ ငါ့ကိုကြည့်ပြီး အူတက်အောင် ရယ်နေပါတော့တယ်။ (ငါ အလဲထိုးခံလိုက်ရရင် ဘာလို့လဲမသိဘူး သူငယ်ချင်း အားလုံးပျော်ကြတယ်။ နင်သိရင် ဖြေပေးပါ သိင်္ဂီ။)

သခွတ်ပန်းမြင်ရင် အသူရာ က သကြားကို အမုန်းစစ်ခင်းတယ်တဲ့။ ငါကတော့ ခေါင်းပေါ်မှာ ဆံပင်ဖြူမြင်ရင် နင့်ကို ချစ်ခင်စွာ သတိရတတ်ပါတယ် လှဧကရီ။ လွန်ခဲ့တဲ့နှစ်ကစလို့ ငါ့ခေါင်းကဆံပင်တွေကတော့ အမြဲတမ်းအတွက်ဖြူနေပါပြီ။ ဆံပင်တချောင်းမှ နှုတ်လိုစိတ်မရှိတဲ့ငါ ဇရာကို ၅၀ကျပ် အကုန်ခံပြီး ကာလာဖုံးဖို့ ကြိုးစားပါသေးတယ်။ ထုံးစံအတိုင်း ငါရဲ့ဆံပင်ဖြုတွေကတော့ ၂-ပတ်အကြာမှာ အဖြူတွေက အဖြူရောင်ပြန်ဖြစ်ပြီး အနက်တွေကတော့ ရွှေညိုရောင်လေးနဲ့ အခုတော့ အညိုရောင်၊ အနက်ရောင်၊ အဖြုရောင် သုံးရောင်ခြယ် High Light လုပ်ထားသလို အရမ်းရမ်းကို လှနေပါတော့တယ်။ 

(မှတ်ချက်။ ။ဆံပင်ဖြူကျွမ်းကျင်စွာ နှုတ်တတ်သော သူငယ်ချင်း Bloger သင်းနွယ်ဇင် အတွက် အခမဲ့ကြော်ငြာပေးခြင်း ဖြစ်ပါသည်။)

photo  source: http://thebeautybrains.com/wp-content/uploads/2007/02/gray-hair.jpg