သနပ်ခါး တမ်းချင်း....

ဒီနှစ်နွေ ရန်ကုန်မှာ တော်တော် ပူပါတယ်။

ကမ္ဘာကြီး ပိုပူနွေးလာတာလား... ကျမတို့ကပဲ အသက်တွေကြီးလာလို့ အပူဒဏ်ကို ပိုမခံနိုင်တော့တာလား။ နွေရာသီက ကျမ နှစ်သက်တဲ့ ရာသီတခုတော့ မဟုတ်ပါဘူး... ငယ်ငယ်တုန်းကတော့ ရာသီဥတုပူတာထက် ကျောင်းမတက်ပဲ အိမ်မှာနေရင်း စားလိုက် သောက်လိုက် ကစားလိုက်နေရတာကို သဘောကျခဲ့တာပေါ့။ နောက်ပြီးတော့ စာအုပ်အသစ်တွေရော အရင့် အရင် သိမ်းထားတဲ့ မဂ္ဂဇင်း စာအုပ်သေတ္တာတွေကိုပါ နွေရာသီဆို စိတ်ကြိုက်မွှေနှောက်ဖတ်လို့ ရသေးတယ်... ဒါ့အပြင် စာအုပ်ဆိုင်က စာအုပ်တွေ တလှေကြီး သွားငှား... မောင်နှမတွေ တယောက်တလှည့် လဲဖတ်ကြနဲ့ဆိုတော့ ပူတာလောက်ကတော့ မှုလောက်စရာ မဟုတ်ဘူးလေ... ။

ငယ်ငယ်တုန်းက နွေရာသီဆို ကျမတို့ နေတဲ့ နယ်မြို့လေးတွေကို မားမား ရောက်လာတတ်ပါတယ်.. (မားမားဆိုတာ မေမေ့ရဲ့ အမေ)... ဖေဖေကတော့ တာဝန်နဲ့ တောထွက်ရတဲ့ အချိန် ခပ်များများထင်ရဲ့... မာမားလာရင် ကျမတို့ စည်းနဲ့ ကမ်းနဲ့ နေရ ထိုင်ရ သွားရ လာရ စားရ သောက်ရ...ပြီး မကြာခဏ အဆူခံနေရတတ်တော့ ကလေးပီပီ သိပ်တော့ သဘောမတွေ့လှပါဘူး။ သူများ အဖွားတွေလို မြေးတွေကို အလိုလိုက်လှတယ် မရှိပါဘူး... အဲ... မားမားမရှိခင်တုန်းက အိမ်အပြင်ဘက်မှာ ညစ်ပတ်ပေပွနေအောင် အကစားမက်နေတဲ့ ကျမတို့တတွေ အဖွားရှိတဲ့ အချိန်ဆို ရေမိုးချိုး၊ ပြီး သူကိုယ်တိုင် သွေးလိမ်းပေးတဲ့ သနပ်ခါးတွေ အဖွေးသားနဲ့ မွှေးကြိုင်နေခဲ့ပါတယ်။ 

မားမားက သနပ်ခါးကို တော်တော့်ကို ကြိုက်တာပါ။ အမြဲတမ်း ခြေဆုံး ခေါင်းဆုံး ညီနေ မှုံနေအောင် ကို လိမ်းထားတတ်ပါတယ်။ သနပ်ခါးကို မက်မောနှစ်ခြိုက်လှပေမယ့် ပါးကွက်ကြားကိုတော့ သဘောကျဟန် မရှိပြန်ပါဘူး။ မားမားသနပ်ခါးလိမ်းပေးရင် သနပ်ခါးအောက်က cream တခုခု ခံလိမ်းပေးပြီးမှ သနပ်ခါးကို ညီညာနေအောင် လူးပေးတာပါ။ ပြီး မှ ပေါင်ဒါတွေ တို့ထားတဲ့ တို့ဖတ်ပဝါနဲ့ တဖတ်ဖတ်ရိုက်ပေးပြီးရင်တော့ သန့်ပြန့်သွားတဲ့ မြေးတစ်ယောက်... ပြီး နောက် တယောက်ပြီး တယောက်ပေါ့။ ဒါပေမယ့် တခါမှ ပါးကွက်မကွက်ပေးဖူးသလို သူကိုယ်တိုင် သနပ်ခါးကို ကွက်ကြားလိမ်းထားတာ မတွေ့ဖူးပါဘူး။

မေမေကျတော့ သနပ်ခါးကို မားမားလို စိတ်ရှည်လက်ရှည်လိမ်းပေးလေ့မရှိပါဘူး.. ဒါပေမယ့် ပါးကွက်လေးတွေ မျိုးစုံ ကွက်ပေးတတ်ပါတယ်။ ပြီး ဘီးလေးနဲ့ ခြစ်ပြီး အကွက်လေးတွေ ဖော်၊ သစ်ရွက်လေးတွေကပ်ပြီး သစ်ရွက်ပုံလေးတွေ ပုလင်းအဖုံးလေးတွေနဲ့ ကပ်ပြီး ယုန်ပုံလေးတွေ ဖော်လို့...  ရွှေဘိုမှာ မွေးခဲ့တဲ့ မေမေက ကျိုက်လတ်သူ မားမားလောက်တော့ သနပ်ခါးကို ခြေဆုံးခေါင်းဆုံး မက်မက်မောမော လိမ်းလေ့မရှိပါဘူး...

အဲ... မေမေ့သမီး ကျမကတော့ ပိုဆိုးပါလေရော... ကျောင်းတွေတက်နေတုန်းအထိတော့ သနပ်ခါးကို ပုံမှန်လိမ်းလေ့ရှိပါတယ်။ သနပ်ခါးနံ့လေးသင်းသင်းလေးက စိတ်ကို ကြည်လင်လန်းဆန်းစေပြီး မိန်းကလေးတွေအတွက်လည်း အလှပြင်ခြင်းကိစ္စ ပြီးတာကိုး။ အဆင်သင့်သုံး သနပ်ခါးအခဲတွေ အနှစ်တွေထက် ကျောက်ပြင်မှာ အတုံးလိုက်သွေးပြီး ချက်ချင်းလိမ်းရတဲ့ လတ်လတ်ဆတ်ဆတ် သဘာ၀ သနပ်ခါးလေးကိုမှ စိတ်တိုင်းကျခဲ့တာ။ အဆောင်နေတုန်းကလည်း ညနေခင်း ရေမိုးချိုးပြီး သနပ်ခါး အဖွေးသား ပါးကွက်ကျားနဲ့ သမိုင်းဝင်းထဲမှာ၊ သဇင်ဆောင်ရှေ့မှာ ၊ ဂျီဟောရှေ့မှာ လမ်းသလားခဲ့ဖူးတာပါပဲ။ 

နောက်.. ကျောင်းပြီးလို့ ဘဝထဲ ဝင်ရချိန်မှာတော့ နေပူကျဲကျဲထဲ သနပ်ခါးတွေလည်း ချွေးတွေနဲ့ ကွက်တိကွက်ကျား ဖြစ်သွားချိန်မှာတော့ .... သနပ်ခါးနဲ့ ခပ်ခွာခွာဖြစ်သွားလိုက်တာ.... စိတ်ကူးပေါက်မှ ထသွေးလိမ်းတဲ့ အခြေအနေကို ရောက်သွားတာပါပဲ။ အရင်က သနပ်ခါးကို အပူဒဏ် နေဒဏ် ခံအောင် လိမ်းပေမယ့် နောက်တော့ ဈေးကွက်ထဲ မြင်လာတဲ့ sun screen တွေ lotion တွေ skin care တွေ လိမ်းဖြစ်လာပါတယ်။ အဲ.. ဒါပေမယ့်... ဒါလည်း ပုံမှန် မဟုတ်ပါဘူးလေ... အသက်လေး ရလာတော့ သနပ်ခါးက အသားခြောက်စေတယ်ဆိုတဲ့ ဆင်ခြေကို သုံးပြီး ကိုယ် သနပ်ခါးသွေးရမှာ ပျင်းတာကို ဖုံးကွယ်၊ ခရင်မ်လေးလိမ်း ပေါင်ဒါလေးရိုက်လိုက်နဲ့ ဖြစ်သလို နေနေပေမယ့် အဲဒီမျက်နှာပြောင်ကို ကြည့်မိတိုင်း သနပ်ခါးလေးကိုတော့ အလွမ်းသားရယ်....။

အခုတလော အပူကဲ လာတော့ ငယ်ငယ်က နွေရာသီတွေကိုလည်း သတိရ၊ ဆုံးသွားပြီဖြစ်တဲ့ မားမားကိုလည်း သတိရ၊ ပြီး သနပ်ခါးမွှေးမွှေး အေးအေးလေးကိုလည်း အရမ်း တမ်းတ...။ အပြင်မှာလည်း အမျိုးသမီးလေးတွေ သနပ်ခါးရေကျဲလေးတွေ လိမ်းလာတာ ပိုတွေ့လာရသလို သူတို့ကိုကြည့်ပြီး သနပ်ခါးရနံ့ သင်းသင်းအေးအေးလေးကို ခံစားလာမိရဲ့။ ဒါနဲ့ပဲ ချောင်ထိုးထားတဲ့ ကျောက်ပြင်ကို ရှာဖွေ ဆေးကြော၊ တနှစ်နေမှ တတုံးမကုန်လို့ ဝယ်ထားတာ ဆယ်စုနှစ်စွန်းနေပြီဖြစ်တဲ့ သနပ်ခါးတုံးတွေထဲက အသစ်တတုံးကို ထုတ် ရေစိမ်ဆေးကြော။ ဒီလောက်ပူတဲ့ နွေနေကိုတော့ မီးမလာလို့ သုံးမရတဲ့ လေအေးပေးစက်တို့ ပန်ကာတို့ အစား ဒီသနပ်ခါးတတုံးကုန်အောင် သွေးလိမ်းရင်း အံတုမဟဲ့လို့ အားခဲထားပါကြောင်း...။   ။